विक्रम् दोङ्: २०६४-०३-०१
आबुव (पक्का) सेवा,
केका झारा निलो चोङ्लो युङ्ङाङीका, खन्ना छा निलो चोङ्लोङे तयुङ्याङ् हे निकीनान् दिप्पापा, दिमामाची, साप्तेनहोङ्मापदो सावा–मिरी, सावा–कुवा, ङाई, पुसङ् दोत्याङ्सो अक्कु छापलावा छाप्दुङ्याङ् ।
एत्नीको नम्माकिनान् काछाप्लावाछा मेन्धित्कु बड्ढेङा लिसाचिला । कामित्माआ मामा–पापा, छन्ना– बङ्ङा, तुम्मा तुप्पा, दिनी –दिक्कु नाना–फेङमाबुङ् , बुसुनीमा–छोछाची निछाची झारा– झारा रिमी पाङ्मीचीआ खन्नालाईङा नितसङ् । एत्नीको एत्तोङ्ना ङाआछे सेन्मोङ्ई बेरी बेरी खाङ्ना कोईना खन्नाओङ् पिमा मेनतोक्ङा खुम्ङा लोन्ङा । बुसुनीमाआ काबोङा कामित्मा बढ्ढे सिकी देम्खा–देम्खाना चाछा पचानीन् , मेन्ईम्ङा कखाखुत छा कप्दी । छोछा खाबाचोङ् पिमा बाङ्मा पुस्सी । उङ्पा खाडो युङ ? देम्खा ता? ङालाई दोरो पखुत्ङा उङ्पा तापङ् ङाछे कनङ्वा तीत खाम्ङा किनान् तोङ्याखिम पुङ्ङा नि रङ्सो हात्नी–ओह्यात्नी अ्होन् । पुक्साकु दुत्तेदो ङा कामित्मा देम्नि सिओङ्। काबो कायाद् तक्सुङ्कु तङ्बुङ् आईतालो लाप्तिखोङ्बो कधुङ्दो कङ्ङेन् ।
ऐ त्नीको निहोङ्होन् मेन्पुङ्मेत्लो ङनङ् पुक्सीपअङ्ना निम्नाबो कखुकदो कामामुमा, निम्नाबो ककोङ्दुमङ्सङ चिमाना निच्चेङा चाईन् ओन्दे । कोइना नम्मा चिएकी तान्दोङा य्ङङी किनान् छा पलिसेन् । कोईना मित्माआ मतैछा पलिनीन् । हङ्मा चामा, दुङ्मादोङा दुङ मान्माछा पलीनिन्कु ओन्दे । आइ पदोङ्ना नेपालदो संबिधान यायोक्लाबो छेन्मादुम लिमा मुयाङ् के ओधोक्कु आराङछा होङ्छामीचीबो कायाद दुम कपुक्कङेन मजबो कोङ्पी छेन्मा पुङ्मा दोत्याङ् । तक्कुबो कायाद खन्नानीन् निहोङ्होन्दो कयुङ्आछे छेम्मा तोक्मादोत् निकु दुम लियाङ् । कोइना ओधोकु तिम्कामी–छन्कामी आ ओधोक्कु बाक्खा छा–होङ्छामीचीबो बाक्खासाया फोङ्मालाई छियाङ् । निहोङ्होन कयुङ नेपालीआछा छेन्मा छिमा पतोक्कीन् नालोना खन्नानीनछा झारा बाक्खासाया, सायानीलेन् होङ्छामीदुमकायाद् नेपाल तामा दोत् नि रङ्सो अक्कु छाप्लावालाई पायानान्तुङ्।
आलाङ्ने सेवा
बुङ्वाफोप्
वर्ष १, अङ्क १, २०६४ असार।
